Breaking News, SAC Ralkap An Chuah Hnu In Miruak 50 Hmuh A Si Cang!PDF in sibawi ralkap zong an i tel hna, tiah a chim chap.

Sagaing ramthen, Yinmabin peng, Yinpaungtaing khua ah umhmun a khuarmi SAC ralkap hna cu nizaan August 14 ah Yinpaungtaing in an chuak i, an chuah hnu ah ngakchia le nu telhin miruak 50 leng kan hmuh, tiah Yinmabin tualchung hriamtlai phu (YPDF) nih an thanh.

 

Miruak hna cu motor pakhat chung lawng ah 30 leeng kan hmuh. Ruak cheukhat cu mei in an khangh hna caah kan hmu kho ti lo. Ngakchia tampi zong mei in an khangh hna i, cheukhat ruak cu hliamhma he kan hmuh hna, tiah YPDF chungtel pakhat nih a chim. A thimi hna chung ah cheukhat cu ral a zaammi an si hna i, Pale-PDF, Yinmabin-PDF in sibawi ralkap zong an i tel hna, tiah a chim chap.

 

Tinpaungtaing lei zong ah khuami nu 24 cu SAC ralkap nih an tlaih hna i, ralphaw ah an hman hna, tiah theih a si. Nizaan August 14 ah SAC ralkap hna cu Yinpaungtaing in an chuak i, Yuanaung khua lei ah an kal,A luancia August 11 in Yinpaungtaing khua ah umhmun an khuar hnu in, SAC ralkap nih khuami an tlaihmi hna lak ah minung 100 cu kan chanh khawh hna i, atu hi si-inn ah kan thlopbul lio hna a si, tiah a chim chap. Yinpaungtaing khua kahdohnak ahhin SAC lei a thimi zong an tam i, hliamtuar zong an tam caah vanlei kahdohnak an tuah, tiah theih a si.

Atu hi Yinpaungtaing khua pawng hrawng in khuami 2000 hrawng cu a himnak hmun ah an zaam hna. Yinpaungtaing khua in a thimi zat cu hlathlainak kan tuah cuahmah lio a si, atu tiang kan hlat khawh tawk ah ruak 50 hrawng kan hmuh cang, tiah Yinmabin PDF nih an thanh.
Credit;The Chin Post