Breaking News Ralzaam Umnak Riahbuk Cu SAC Ralkap Nih An Khangh!

Yinmarpin Peng Ah Ralzaam Umnak Riahbuk Cu SAC Ralkap Nih An Khangh!Sagaing ramhen Yinmarpin peng Bant Bwaykhua i ralzaam umnak riahbuk (thlam) pawl cu SAC ralkap nih July 20 le 21 ah an khanghpiak hna i buk 25 a kaang, tiah tualchung mi nih an chim. Bant Bway ahhin ralzaam riahbuk 50 leng a um i cu chung ah buk 25 cu khangh an si, tiah Bant Bway khuami pakhat nih a chim.
Khuachung um ahcun i thuhnawh peng a si i cucaah ramlak ah kan i thial. Duhsah tein ramlak ah inn tete a hun tam chin lengmang. Cucu SAC ralkap nih an duh lo i rallam an sial pah ah an khangh. Atu ah cun khoika hmun um zong ah zaam peng a hau cang. Nihin zong SAC ralkap hna cu rallam an sial than i tualchung mi vialte kan zaam dih, tiah tualchung mi nih an chim.

 

Relchap,Chin ramkulh, Falam-Hakha karlak ah SAC ralkap le Chin hriamtlai phufonh hna karlak ah ni 8 chung kahdohnak a chuak i khuami 20,000 hrawng nih innlo an zaamtak. Kahdohnak a daih pah ruangah cheukhat khachung kir than a si ko nain khuaning in khanghpiak a si caah harnak an tong.

Chin ramkulh, Falam-Hakha karlak lam thluangthluan ah SAC ralkap le Chin hriamtlai phufonh hna cu July 16 tiang kahdohnak a chuak. Ni 8 chung kahdohnak ruangah a pawngkam khuami hna cu himnak hmun ah an zaam. Atulio caan ah kahdohnak a um ti lo nain a zaammi an zapi tein an kir kho rih lo tiah theih a si.Kahdohnak chungah ralzaam 20,000 hrawng an um. Kahdoh a chuaknak

 

lamcung khuate inn tampi cu khangh a si. Falam peng, Taal khua cu inn 7 lawng a tang. Falam-Hakha lamcung kahdohnak a chuak lioah khuami hna cu a pawngkam himnak hmun ah an i dor chung tiah theih a si.Chin ramkulh, Falam-Hakha karlak kahdohnak ah SAC ralkap 50 leng an thi, Chin hriamtlai phufonh in 2 an nunnak a liam i 14 nih hliamhma an tuar tiah CJDC biachimnak nawl a ngeitu sin in theih a si.

Karenni Ramchung i Ni 5 Chung Kahdohnak Ah SAC Ralkap 23 An Thi!: Karenni ramchung i ni 5 chung kahdohnak ah SAC ralkap 23 an thi, tiah Karenni Nationalities Defence Force (KNDF) nih nihin July 22 ah cathanh an chuah. A luancia July 16 ahkhan Pharuso( no. 44, SAC ralkap sianginn in Dawlawkhukhua lei ah a kalmi SAC ralkap 4 cu, KNDF B-15 le Karenni Army(KA) nih an kah hna caah SAC ralkap pakhat a thi i, meithal pakhat an laak khawh tiah theih a si.July 16 Thiam, zaanlei suimilam 6:00 hrawng ah Demoso peng, Ukhurikhuachung i umhmun khuarmi SAC ralkap hna cu KNDF/BO1, BO5 le KA nih an kah hna i, minutes 30 hrawng kahdohnak a chuah hnu ah SAC ralkap 3 an thi.

July 18 ah Demoso peng Taesulay khuachung ah umhmun khuarmi SAC ralkap hna cu KNDF BO5 le BO6 nih an kah than hna i, SAC ralkap 2 an thi. July 18 vek, zinglei suimilam 5:00 hrawng ah Phekhon peng Mubae SAC ralkap khah-mah-yiah 422 battalion cu KA, KNDF BO3 le KNDF B11 nih an kah hna i, kahdohnak suimilam pakhat hrawng chung ah SAC ralkap 3 an thi, tiah theih a si.

SAC ralkap nih Mubae, Puai Kung Tung sangchung RC Biakinn chung ah a ummi Biaknak lei hruaitu le ngakchia hna cu an tlaih hna, tiah an cathanh ah cun an langhter fawn.July 18 Chunhnu suimilam 1:00 hrawng ah KA, Phekhon PDF, Mubae PDF, KNDF BO3 le BO4 phufonh nih Biakinn ah umhmun khuarmi SAC ralkap hna cu an kah hna i SAC ralkap 4 an thi, tiah theih a si.

July 21 ah Phekhon nichuah lei Lahay SAC ralkap sakhan cu Phekhon PDF, KNDF B03, B02 le B11 phufonh nih an kah hna i SAC ralkap 9 an rak thi. Cun, Warisupahlaing khua pawng kahdohnak ah SAC ralkap pakhat a thi than.SAC ralkap hna nih cun kahdohnak a chuah lonak Demoso peng khua hna cu nifatin ngawt hriamngan in an kah leng ah, Mubae le Phekhun kar hrawng kahdohnak ah SAC ralkap hmanmi hriamngan kuan cu khuachung ah an tla i, tualchung mi hliamhma tuar zong an um. Cupinah inn zeimawzat zong an rawk, tiah an theih a si.
Credit;The Chin Pot