An thiltuah mi hmuh tik ah cawn awk tlak taktak an si zohchun awk atlak mi pasaltha nu saltha hna cawlcangh nak

Kalaymyo ah hramhram uknak duh lo langhternak cu September 19 ah Mipi le hriamtlai phu pawl nih an tuah tiah theih a si.

 

 

Duh lonak a langhter mi mipi pawl nih hramhram uknak an doh lawng si lo in Myanmar ram he pehtlai in UN palai U Kyaw Moe Htun kha hmunhma pek rih ding in an lungtlinnak catar pawl an i put i lam an zawh tiah theih a si,Lam zawhnak ah Vakok CNDF phu nih an zulh ve hna tiah theih a si.

 

 

Sagaing ramthen, Kalewa peng Masein khua palik sakhan pakhat cu Kalewa-PDF nih an kah caah palik 7 an thi i, meithal zun 8 an chuh hna, tiah theih a si.

 

 

PDF-Kalewa ralkap hna nih Masein khua palik sakhan cu September 18 zing sml 6:05 ah kan kah caah palik 7 an thi, a dang a thimi zong an um kho rih. Cheukhat palik pawl cu an hliamhma he an zam. PDF-Kalewa ralkap leiin a thimi le aa hliammi kan um lo. An sakhan cu mei in kan khangh i, hnu kan kir tiah PDF-Kalewa nih an langhter.

 

 

Cu kahdohnak ah G3 meithal zun 5, Uzi meithal zun 2, M79 zun 1, kutcheh bomb lung 3, 7.62 meithal kuan 297, Uzi kuan 149, cycle 125 4, pehtlaihnak seh 2, phone 13, Power bank 1, Laptop 1, phaisa bawm 2, tangka kyats 13,000, kutkhih cikcin tuah 2, suiṭhi 1, bag 1, zal 3, nam 1 le Equipment 1 an lak, tiah theih a si.

 

Cu kahdohnak ah tualchung mi nu pakhat a nunnak a liam. PDF-Kalewa nih nu pakhat a nunnak a liam caah a chungkhar cu ngaihthiam an hal hna. Palik 7 a thimi hna chungkhar cu SAC nih tangka kyats 30,000 cio an pek hna, tiah theih a si.

 

Fianternak: Dohthlennak ralkap timi chungah SAC a dohtu tlangcung hriamtlaibu, tualhcung hriamtlaibu, PDF le CDF vialte an i tel.

 

Feb 1, 2021 ah MAH nih nawlngeihnak a lak in thla 7 a rauh hnu Sept 7, 2021 ah NUG nih D-Day a thanh i cu ni in hriamtlaih in khuapau dohthlennak cu aa thok. Atu tiangah dohthlennak ralkap hna nih ramchung huap in SAC ralkap sakhan 90 leng an lak cang. Hi an lakmi ahhin SAC ralkap caah a biapi tukmi sakhan zong an i tel len.

 

Kum 2021, March thla dihlei ah China-Myanmar ramri Alaw Bun tlangah a ummi SAC sakhan cu KIA nih an lak. Alaw Bun tlang cu Kachin ramkulh Bhamo pengkulh Dawtphoneyan peng ah a um i KIA nih umhmun an rak khuarnak a si. Kum 1987 ah Kawl ralkap nih an rak lakmi a si.

 

Alaw Bun sakhan laknak ahhin CNA zong an i tel ve. Nunnak a liammi zong an um. KIA nih an lak hnuah SAC ralkap nih lak than dingin April, 2021 ah hriamngan le vanlawng in an kah nain an lak than kho ti lo.

 

KIA hruainak tangah Kachin People Defense Force (KPDF) an ser i SAC sakhan zeimawzat cu an lak than. KIA/KPDF nih an lakmi sakhan hna cu Hpakan peng ah 5, Putao pengah ah 3, Tanai pengah 2, Bhamo pengah 3 le Waingmaw pengah 3 hna an si. Shwegu peng zongah an lakmi a um nain a zat theih a si lo. KIA hruaitu pakhat nih “Shwegu peng i sakhan cu kah loin kan lak, anmah tein an zam dih” tiah a chim.

 

Kaya ramkulh ah tualchung hriamtlai hna nih SAC ralkap sakhan 14 le palik sakhan 5 an lak cang. Karenni National Progressive Party (KNPP) secretary Khu Daniel nih cun “Mese, Hpasawng, Hpruso, Bawlakhe, Demoso le Shadaw peng hna ah SAC ralkap le palik sakhan tam ngai kan lak” tiah a chim.

 

KNPP le Karenni Army (KA) nih an lakmi sakhan lakah SAC ralkap 30/40 hrawng an umnak pahnih aa tel i a dang cu ralkap 10 hrawng lawng an umnak a si. Sakhan 4 cu 2021 chungah an lak i 2022 chungah an lakmi a tam deuh cang tiah theih a si.

 

Chin ramkulh ah CDF nih SAC sakhan pathum an lak cang. Cu an lakmi hna cu Thantlang peng Lungler sakhan, Mindat peng Makui Ingnu khua palik sakhan le Suntaung khua palik sakhan hna an si. Lungler sakhan cu CNA le CDF-Thantlang nih September, 2021 ah an lak. Makui Ingnu sakhan ah palik 30 renglo an um i July, 2021 ah CDF-Mindat nih meithal puah hau loin an rak lakmi a si.

 

CDF-Mindat chimnak nawlngeitu Salai Hwa Awng nih “An bawipa cu khua chung a rat lioah kan tlaih. An sakhan cu kan kulh dih i nan hriamnam chia u, kan in that hna lai lo. Kannih Chin miphun cu zumhtlak kan si kan ti hna i cuticun an sakhan cu kan lak ko” tiah a chim. Suntaung sakhan zong palik nih an zamtak caah meithal puah loin an lakmi a si.

 

Karen ramkulh ah KNU nih SAC ralkap sakhan an lakmi hi a tlawmbik 12 a si lai tiah KNU nih an thanh. KNU nih an lakmi SAC ralkap sakhan hna hi Brigade 5 chung Papun pengkomh, Brigade 6 chung Dupalaya pengkomh le Brigade 3 chung Mone pengkomh ah a ummi an si.

 

AA nih SAC ralkap sakhan an lakmi hi a dihlak in 36 a si cang. Hi chungah Chin ramkulh Paletwa peng in sakhan 6 an i tel. A dang cu Rakhine ramkulh Maungdaw peng ah a ummi an si.

 

AA nih an lakmi lakah Myanmar-Bangladesh ramri Maungdaw peng ah a ummi SAC tang ramri hngak ralkap sakhan kha a ngan ngaimi a si. SAC ralkap 19 an thih pinah hriamnam tampi an lak khawh. AA nih meithal puah loin an lakmi zong a um len.

 

Tlangcungmi hna hmunram ah SAC ralkap sakhan lakpiak an ton bantukin Kawl miphun an umnak le PDF an cawlcangh biknak Sagaing le Magwe ramthen zongah SAC nih an sakhan an sunghmi a um len. A zat tu cu fiangin theih a si lo.

 

Atulio Myanmar ram kong a hlathlaitu pakhat nih cun “SAC ralkap hna cu kah ding an tih tuk. Kahdohnak a um zongah kan sung lai ti an theih caah sakhan hme deuhmi cu an zamtak hna. Cun ralkap 10 hrawng an umnak sakhan ah ralkap 30/40 an chiahnak zong a um len. Cutikah hmundang ah minung an i deih ti lo.

 

A bik in Sagaing le Magwe ah sakhan hme deuh an zamtakmi a tam. Khatlei ah dohthlennak ralkap thiamnak, hriamnam le thazang an thancho deuhdeuh tikah SAC ralkap nih cun khuapi le pehtlaihnak lam tlaih khawh lawng an i zuam cang. Khuapi he aa hlat deuhnak hmun paoh cu dohthlennak ralkap hna kuttangah a um dih cang” tiah a chim.