Aa Lawmmi Si Na Duh Ah Cun

Sifak zawn a ruatmi cu lunglawmmi a si, harnak chung i a um tikah Bawipa nih a bawmh lai. (Salm 41:1) Ni khat cu tlangval no pahnih khual an tlawng i lo lak an kal lioah lamkam ah but kedan a chia nawnmi te tuah khat an hmuh. Pakhatpa nih aa thawh i, Hi kedan hi lothlo tarpa kedan a si ko lai. A kedan hi thuhpiak usih law lungrethei in a kedan a kawl lio kha a thlite in kan zoh lai.

Tiah kan nihsawh lai. Cuticun tarpa cu kan dehcawh lai, tihraam usih law i nuam usih i lawm usih,” tiah a ti. I, a hawipa nih ka dua, cuticun a si lo hme cu. Midang harnak an ton i lungrethei an um lio kha zohnuam ah ruah ding a si lo teh. Midang lungrethei i an um lioah rak i lawmh ding a si lo. I nuamh le i lawmh maw na duh? I lawmh na duh si ahcun, Atu tangka kan i kenmi hi a kedan chungah.

Kan chiah veve lai i, tarpa nih a kedan a vun i danh tikah a chung tangka kha a hmuh lai. Khuaruahhar in a um i lawmhnak in a khah lio tu zoh usih law i lawm ve usih,” tiah a ti. Cuticun an tuah i tarpa cu chuncaw ei dingin a thlam leiah lawi a vun i tim. A kedan a vun i danh, thil pakhatkhat nih a ke a doh. A zoh i tangka a rak si diam, a khuaruah a har kho tuk.

Khat lei a vun i danh i a doh han, a vun zoh i tangka a rak si han. Ai lawmh tukah aho nih fial lo le tlaih awk țha loin a biang cung mitthli an rung tolh thliahmah ai. A khup ai bil, a kut pahnih a komh. Cunglei a zoh i hitihin lawmhnak bia thang piin a chim. Maw Pathian, kan caah a țha bikin khua na khan zungzal i kai lawm tuk. Na min thiang kan thangțhat. Aho nih mah tangka hi a rak ka pek ti ka hngal lo.

Sihmanhsehlaw atu bantukin tangka a rak ka petu cung zongah kai lawm tuk. Zeicahtiah ka nupi a zawtnak ni thum a si cang, nain sii cawknak tangka kan ngei lo. Kan fanu zong inn ah ei awk kan ngeih lo ruangah zingka tein zei hmanh a ei rih lo. Atu cu hi tangka na kan pekmi hin sii cawk khawh a si cang i kan fanu te ca zongah ei awk cawk khawh a si cang. Kai lawm tuk e maw.

Ka Pathian a țha tukmi ka Bawipa,” a ti i a mitthli he lawmhnak bia a chim. Cu ti tarpa ai lawmhnak mitthli a biang cung i a luan thliahmah cu pakhatnak pa nih a hmuh tikah ai lawm tuk ve i a mitthli a luang riahmah ve. A pahnihnak pa zong nih a hawipa mitthli a luan kiarmar a hmuh tikah amah zong lawmhnak in a khat i a mitthli a tla riahmah ve.