A Hawikom Thabik A Simi Pa nih A Khualtlawn Kar Ah A Nupi He Chunzan In Nupi ah a rak i Tuah Diam Ko Hih

Atu ka nupi he hin High School kan kal lio in kan i duh i college kai kan dih hnu tiang kan i duh.Ka nungak hngeih hmasa bikmi a si i a tlangval hmasa bikmi ka si ve.Kan i umh tiang kha kan pahnih in kan thianghlim veve ti cu 100% in ka chim ngam. Kan nu he kan i umh hnu ah hin fa 3 kan ngei i kei hi cozah riantuan ka si caah Aizawl in sml 4 hrawng kalnak khua ah cunglei nih ka rian an ka thial diam. Kan fale sianginn kainak alaklawh caah keimah lawng ka riantuan nak ah cun ka um i ka nupi le fale cu Aizawl ah an um.

Acaan tete ah sunday va hmang dingin Aizawl lei ah cun ka tlung tawn i monday zingka tein ka riantuannak khua lei ah cun ka va kal than tawn. Asinain ka ruahlo ning tuk in thil a cang diam. Voikhat cu ka riantuannak in Aizawl ah ka rak tlung i kan innchung ka luh bak ah cun kan innpa i a um vemi ka hawikom thabik(Ka best friend nupi) cu kan inn ah a rak lut i ka nupi cu heh tiah a rak sawh chih i biafak fak in a rak thuat. A pasal he ka nupi cu i duh ah a van puh hna.

Keizong cu inn ka phak bak a si i thil sining zeihmanh ka thei kho velo i ka ar ko. Zeitindah nan si cucu? tiah ka hal hna i ka hawipa nupi nih cun” nan nu le ka pasal hi an i duh . An sining hi a theilo tiah an ka ruah menlai nain ka theih tuk hna. An i chat nak zong ka hmuh dih hna i nangmah sin zong ah kan chimh te lai ka ti nain a caan a um kho rihlo i si tiah a van chim thluahmah ko. Ka lai tuk i kan nu cu zeiti tuah awk zong ka thei velo. Ka hawipa nupi nih cun a rannak in nan nu hi na chimhhrin a hau , culo ah cun faktuk in kan mual a pho sual lai tiah a chuah lai ah cun bia a ka cah ta i a kan chuahtak diam.

A chuah hnu ah cun kan nu cu van sik ding tiah le a ruang bik ka thei tunglo. Bia ka hal i a ka la leh vemi cu ” na hawipa a siko i nangmah zong nih na um lo karlak ah a herhnak poah ah rak bawm dingin na chimh ta mi a si ko i kan herhnak tete ah a kan bomh mi kha an nu nih a remlo i siko cuh” tiah a ka ti ve i keizong nih cun siarem tein a si tak ee” tiah ka hei zumh ve ko. Kan nu he hin ka hawipa hi an i duh ti hrim ka lungthli pel hmanhin ka ruat ve lemlo.

Monday zingka cun ka riantuannak lei ah cun kai thawh than i , nithum hrawng ka um ah ka nu nih” nan nu a umdan hi a dik lo. Asining dihlak chim ah cun a thalo i a tlangpi lawng in kan chimh van theithiam ko” tiah phone a van ka chawnh.Hringtu nu tiang nih ka nupi kongkau a van ka chimh cang ah cun ka siarem kho ve tilo. Cuticun kan nu hi a sining dihtak theih a hau cang tiah ka riantuannak cun Aizawl lei ah kan nu zong chimta bak lo in ka va tlung.

Kan nu cu amah zong chimta loin zarh laklawh i ka va tlun cu a lau tuk ve. A mit au zoh tikah thil diklo a um ti cu theihkhawh pah a si ko.Ka phak zaan ah cun kan nu phone cu ka lak i a phone cu ka zoh dih. Kan nu hi a phone password chiah a hmang ballo mi a si i cuzan zong cu password a chia lemlo i ka duh duh ka zoh khawh.Kan nu phone cun amah bantuk in ka hawipa cu ca ka hei kuat.”Na kawipa arak tlung hi na thei kolo maw” tiah ka kuat i a rannak in hitihin a van ka leh colh. rak tlung rih hlah sehlaw siko mi zeihme a rak tlun hnga” tiah.

Ka lau tuk i”atlun zong ah a poinak um hme maw” tiah ka kuat than i a rannak in ” a umlo hmanh ah caan kan ngei kholo tuk hi a rak tlun le bang ah cun kan i hmuh khawh ti tung lailo” tiah a van ka leh ve than colh.Kai thawh rih i ” nan nu ka tluk lemlo le a poi an ti tak bal lalo cuh” tiah ka kuat i” kan nu nak in a itpi na nuam deuh tuk i nan pa nak in ka zei deuh ve kha” tiah a van ka leh than. Aww hurduhcuai nak tlang tiang an rak phan cang mu ti cu 100% in ka fiang cikcek cang.

Ka thinlung cu a kekkuai taktak nain zeihmanh a theilo bantuk te cun kai um ter. A thaizing ah cun kan office lei rian ah ka chuak i zanlei ka rak lawi cu kan nu mithmai cu tlak dih a rak i tim. Zaan i amah bantuk in ka kawipa ca ka kuatmi vialte kha thei dih sehlaw a lo. Ka cakuat pawl cu ka delete dih i screenshot cun kai chiah dih hna. Khua ka ruat i fa 3 kan ngei cang fawn i ka nupi then i fale hngaktah i chiah cu ka ruat kho ve bak lo.Cucaah kan nu he kan ka hawipa he ka auh hna lai i tha tein bia ka ruah hna lai i an zia thin dingin , cun ka ngeihthiam hna lai tiah bia khiah nak kai tuah.

Kan nu zong cu bia ka ruah i amitthli he ngaihthiam a ka hal tuk i ka ngaihhthiam taktak.Asinain ka hawipa cu phone ka call i a rak ka block cang ti ka fiang. A nupi ka call than i a rak ka block ve fawn. Kan nu cu fak ngai in ka sik ta hnu ah ka riantuan nak lei ah cun ka kal than. Ka thinlung cu a kekkuai dih taktak ko. Asinain chungkhar tio dih cu ka ruat kho fawn lo. Ka riantuannak in ka fale hi zanchiar ka chawnh tawn hna i ka nupi zong ka chawnh peng tawnmi kha chawnhbiak duhnak thinlung ka ngei kho tilo.

Kei hi cozah riantuan ka si tik ah ka tuan nak khua nungak pawl hi cu tha deuh in chawnhbiak ah cun ka caah ai ready dih mi an si ti ning law ka chim sual lem lailo. Asinain ka nupi ka fale caah hin zumhtlak tein ka um zungzal. Asinain tu ah cun ka nupi ka cung i a um ning ka ruah tik ah le padang he hurduhcuai in caan an rak hmang cang ti ka theih ve tikah cun ka thinlung ah nupa sinak tuahpi dingtiang hmanh khi ka ruat kho ve tilo. Thlakhat hrawng a rauh ah ka riantuannak khua ah cun kan rian kan i daihlo tuk ruangah nungak muidawh ngaimi pakhat an rak chiah ve than.

Cu nu cu a umnak in a tlamtlin deuh hlan cu keimah sin ah an rak umter chung. Ka sining ka chimh ruah i a sining dihlak a ka chimh ruah ngam ve.Kan i tlaihchan veve i khuami zong nih an kan capo pah lengmang.Asinain kan chunglei ah cun zeihmanh thianhlim lonak kan ngei lemlo. Can a rau deuh deuh i ka nupi he nupa sinak kan hman tilo nak kong tiang zong ka chimh ngam cang.Ka sining a theih tik ah a ka zangfak ngai i a mit au zoh ah hin a ka duh ve ko timi cu theihkhawh colh a si .

Cuticun kum 2 chung ka nupi he nupa sinak zong hmang tilo in a minlawng in nupa kan si cang tik ah le keimah zong ka riantuannak ah nungak fel le muidawh he umtti peng hrat ah cun ka nungak nu he cun kan i duh ve cang.Arauh hlan ah nau a pawi i ka thit ve hrim a hau cang fawn. Cun ka nupi cu nupi ah kai tuah khawh ve tilo hnu ah cun then lo awk tha a si ve tilo fawn tikah ka then i ka nungak nu tu cu nupi ah tha tein ka thit lawlaw ve. Ka fanu hniang hi a nu sin ah a um i a ule 2 cu ka nulepa sin ah an um .

Ka hawipa,tha tein ka nupi he ka chimh hna lai i ka ngaihthiam hna lai tiah khua ka ruah i ka call lio kha,ka hawipa cu police a si i i thialnak arak tuah i Manipur lei ah an rak i thial cang a rak si.Tubantuk in ka nupi then in nungak dang nupi ah ka thit tikah keimah fello le zumhtlaklo ah mi vialte nih cun an ka ruah i an ka soisel ko. Asinain keimah minchiat lawngte in kal ko seh ka ti i ka nupi nih thlaici thalo a tuhmi a theipar vialte cu chungkhar kuainak in lungfak ngai in kan zuun.